Goierriren egoitzan, Aldirin edo ikastetxeetan eman behar dute izena interesatuek

URRETXU. Aurtengo ikasturtean ere, Goierri Kirol Elkarteko saskibaloi sailak, Udalaren laguntzaz, eskola abian jarriko du.
Bertan parte hartzeko ez da ezer ordaindu behar. Saskibaloia gustuko duten eta giro atseginean jokatzeko gogoa duten guztiek parte har dezakete. Baldintza bakarra, 1994, 1995 edo 1996an jaiotakoa izatea da. Eskolak Aldiri kiroldegian izango dira, igandeetan, 9.30etik 11.00etara. Lehen saioa azaroaren 6an izango da. Ekimen honetan parte hartzeko asmoa dutenek, Goierri Kirol Elkartearen egoitzan, Aldiri kiroldegian edo ikastetxean eman dezakete izena.
Saskibaloiak une gozoa bizi du Urretxu eta Zumarragan. Hala, Goierrik bere talde kopurua bikoiztu egin du bi urtetan: aurten bederatzi ditu. Mutiletan, infantil mailako bi, kadete mailako bi, junior mailako beste bi eta senior mailakoa ditu. Nesken artean, berriz, talde bakarra dago: junior mailakoa. 100 gazte baino gehiago aritzen dira saskibaloian. >A.Z.